نرخی زێڕ لە ئاستی جیهانیدا جارێکی دیکە بەرزبونەوەی بەخۆیەوە بینی

نرخی زێڕ ئەمڕۆ دوشەممە زیاتر لە 1% بەرزبوەوە، بەهۆی سەرهەڵدانی پێکدادانی توندوتیژی نێوان هێزەکانی ئیسرائیل و بزوتنەوەی حه‌ماسی فەڵەستین لە کۆتایی هەفتەی رابردودا كه‌ مەترسییەکانی پێکدادانی بەرفراوانتر لە ڕۆژهەڵاتی ناوەڕاست زیادکرد.

له‌ به‌ره‌به‌یانی 7ی ئه‌م مانگه‌وه‌ بزوتنه‌وه‌ی حه‌ماس ئۆپه‌راسیۆنی له‌ژێر ناوی “لافاوی ئەقسا”ی دەستپێکرد، لەو ماوەیەدا ئیسرائیل بە چەند هەزار موشەکێک لە کەرتی غەززەوە کرایە ئامانج و چەکدارانی فەڵەستینیش ئۆپەراسیۆنی تایبەتیان ئەنجامدا، له‌وه‌ڵامی ئه‌و ئۆپه‌راسیۆنه‌دا ئیسرائیل بۆردومانی کەرتی غەززەی ده‌ستپێکرد و سەدان کەسی کوشت.

نرخی زێڕی بە ڕێژەی 1.2% بەرزبوەوە و گەیشتە 1850 دۆلار بۆ هەر ئۆنسەیەک

نرخی زێڕی بە ڕێژەی 1.2% بەرزبوەوە و گەیشتە 1850 دۆلار بۆ هەر ئۆنسەیەک، بە هەمان شێوە نرخی زێڕی ئەمریکا بە ڕێژەی 1.2% بازدانی بەخۆیەوە بینی و گەیشتە 186 دۆلار.

له‌ بازاڕه‌كانی هه‌رێمی كوردستانیش نرخی مسقاڵێك زێڕی عه‌یار 18 به‌ 364 هه‌زار دیناره‌

محه‌مه‌د حسێن، له‌ زه‌ڕه‌نگه‌ری‌ نیاز له‌ سلێمانی‌ به‌ خه‌ندان-ی‌ راگه‌یاند، له‌ بۆرسه‌ی جیهانی نرخی یه‌ك ئۆنسه‌ به‌ 1850 دۆلاره‌، له‌ بازاڕه‌كانی هه‌رێمی كوردستانیش نرخی مسقاڵێك زێڕی عه‌یار 18 به‌ 364 هه‌زار دیناره‌.

مسقاڵێك زێڕی عه‌یار 21یش به‌ 424 هه‌زار دیناره‌

ئاماژه‌ی به‌وه‌شكرد، مسقاڵێك زێڕی عه‌یار 21یش به‌ 424 هه‌زار دیناره‌، یەک لیرەش بە 408 دۆلار مامەڵەی پێوەدەکرێت.

توندوتیژیەکان هەڕەشەی هەڵگیرسانی شەڕێکی نوێی گەورە لە رۆژهەڵاتی ناوەڕاست دەکات

پەرەسەندنی توندوتیژیەکان هەڕەشەی هەڵگیرسانی شەڕێکی نوێی گەورە لە رۆژهەڵاتی ناوەڕاست دەکات، کە دەبێتە هۆی بەرزبونەوەی نرخی نەوت و بەرزبونەوەی خواست لەسەر سامانی پەناگە پارێزراوەکانی وەک بۆندەکانی گەنجینەی، دۆلار و یێنی ژاپۆنی، لەگەڵ زێڕ.